.

NOU PARLACHE
Notre langage   Notre patois

J’t’arconnos ti,

T’es d’min coin

Ti, t’eufes et’porte et té dis « Rinte »

Mettez-vous ! Quoi qu’o z’allez printe

Té bos tin café à l’chuchette

Eun goutte d’ieau ch n’s’arfuse point

Ej t’arconnos, ti t’es d’min coin 

T’s trahi quand qu’té prononces « a »

Tes in colère, té parles patois !

Té ris cor comme eun’amusette

A raconter des cafougnettes.

T’in coeur i est douche pour ch’tit Quinquin

Ej t’arconnos, ti t’es d’min coin

Donner couleur à ches bois’ies

A Pâques a’mouv’ler l’tapiss’rie

Mason d’coron loin d’ête taudis

Et du qu’in sait faire sin sam’di

Et briquer ch’querpion avc soin

Ej t’arconnos, ti t’es d’min coin

Y’a des noms d’villaches qui t’font braire

La Clarence, Liévin pis Courrières

Des mots qu’in avot peur tout gosses

Coup d’poussière, grisou, silicosses

In s’taisot in serrant nos poings

Ej t’arconnos, ti t’es d’min coin

In l’sait bin qu’’t’as l’cœur à l’ouvrache

Qu’tésaques ed’dins toudis in nache

Qu’ch’est ti aussi qu’in ira querre

Pour vénir au au s’cours ed tin frère

Quand ch’est sin tour d’ête dins l’besoin

Ej t’arconnos, ti t’es d’min coin

N’laichez point perde chés qualités

Qui font nous personnalité

Gins du Nord, sauvez nou parlache

Donnez à ch’est tchiots ch’léritache

I’s diront pus tard, s’veyant d’loin

Ej t’arconnos, ti t’es d’min coin

                                                      Auteur non spécifié

         LES PATOISANTS SONT TOUDIS LA !

                                    Une chanson d'Anne-Marie DEROUSSEN
                                    sur une musique de Charles Bodart-Timal


I paraîtrot, d'après chin qu'in raconte,
Qu'parler l' patos, cha n'est nin beau du tout;
I n' d' a gramint qui s'prenn't' pou du beau monte,
I n'veutt' nin qu'i seuch ' parler pa tertous.
Mais, heureus'mint qu'y-a des gins pou l'définte,
Mêm' si pour cha, faut s' donner gramint d' ma !
Mais, heureus'mint qu' pou l'aimer et l'comprinte,
Les Patoisants sont toudis là ! (bis)


I sont tertous fin firs ed' leu parlache,
Qu'i seuch'te d' Lille, d' Roubaix o bin d' Tourco !
Pour euss' , i n'a rin d' pus beau qu' leu lingache,
Et cha, i z'ont nin peur de l' dir' bin haut.
Leu z'accint i-a in p'tit goût d' chuch'mourette,
Ch'est bin normal et y-a pos d' ma à cha !
Pou que l' patos i seuch' souvint d' la fête,
Les Patoisants sont toudis là ! (bis)


Pou l' bonn' humeur, cha, in peut vraimint l' dire,
Les Patoisants, ch'est pos des bonnets d' nut !
Pou chin qu'i est d' bin s'amuser et d' rire,
Les Patoisants i n' s'arrêtt'rotte pus !
Dins les soirées, pour pousser l' tchansonnette,
I n' y-a personne pou les batte à ch' jeu-là !
Dins les veillées, pou dir' des garlouzettes,
Les Patoisants sont toudis là ! (bis)


Dins les bantchets, faut les vir à l'ouvrache :
Pour el' djaîté, i n'ont pos leu parel;
Pou berlaffer des frites et des couqu'baques
Et boire in.n' bire, i sont tout in foufelle !
Et tchand qu'i s' treuf't' su in.n' terre étringère,
Pou s'arconnoîte et dir' les mots pou cha :
Les "Ti", les "Mi", les "Mopère", les "Mamère",
Les Patoisants sont toudis là ! (bis)
5
L'patos, dins l' temps, i-avot ses grands poêtes.
Mêm' disparus, i sont toudis vivants;
Les Patoisants, cha n'est pos d'z oubliettes,
I continut't' su les pas des pus grands :
L'Broutteux, Simons et l' père d' Cafougnette,
Bodart-Timal, ceuss' d'ichi et d'là-va !
Pou que l' Picard i-euch' acor' ses "Bell' -Lettes",
Les Patoisants sont toudis là ! (bis)

                                                                           Déchimpe 1994

ACCUEIL